O pasado luns día 2 de setembro tivo lugar na sede do Celta da rúa do Príncipe a firma do convenio de colaboración entre a Fundación Celta de Vigo e o Club Apóstol Santiago. A través do mesmo fixaron os seguintes acordos:
Créase a Escola Deportiva FCV- Apóstol no máis alto estándar de actuación da FCV para o asesoramento e seguimento dos nosos técnicos e xogadores, así como a escola de tecnificación.
Asígnase ao noso club un responsable específico do departamento de coordinación deportiva de categorías inferiores do RC Celta de Vigo con presenza nas sesións de adestramento en campo.
Implantaranse as pautas básicas de metodoloxía utilizadas polas categorías inferiores do RC Celta.
Estes son os puntos máis relevantes do convenio que engloba moitas máis medidas, todas centradas na formación integral dos nosos e das nosas deportistas, buscando o máximo nivel de esixencia na súa formación deportiva, dentro sempre dos valores intrínsecos ao noso club e a nosa maneira de entender o deporte.
A Escola Deportiva estará enfocada cara ás seccións de futbol e fútbol sala, desde as nosas escolas de fútbol e fútbol sala (Samil), que contarán cun asesor presente en todas as sesións, ata categoría xuvenil.
